Nuummi ilinniartitsinermut app nutaaq nunatsinneersoq misilerarneqartoq

Qaqortumi, Narsami, Aasianni, Kangaatsiami, Nuummi Qaanaamilu Piareersarfinni ilinniartitsisut isumasioqatigiinnermut ”App’it atorlugit ilinniartitsineq”-mik qulequtaqartumi Nuummi Katuami apriilip qeqqani katersuupput. Isumasioqatigiinnermi peqataasut Nuummi Piareersarfiup ineriartortitarisaa app’i ”Sammisat”-mik taaguusigaq misilerarpaat. ”Sammisat” tassaavoq suleqatillu agguataarneqarsinnaasunik ilinniartitsinissamut pilersaarutinik atortussanillu Piareersarfinni ilinniartitsisut suliarisinnaasaannut sinaakkutissiisinnaaneranut sakkussiaq.

Isumassarsiaq ”Sammisat” Piareersarfik Nuummi pinngorpoq. Piginnaanngorsaanermik ingerlassani AEU-mi FA-milu ilinniutit ineriartortinnerinik arlalinnik misilittakkanik ukiuni arlalinni katersuisoqarsimavoq. Piareersarfinni ilinniartitsisut amerlanerpaat namminneq ilinniusiortarput, atuagarsornermut sammisumi piginnaanngorsartuni saaffigisanut soqutiginarsarniarlugit, aammalu atortussanik atuartitsissutissanik naleqquttunik amigaateqaramik. Taamaattorli ilinniartitsinissamut atortussiat ataatsimut katersugaaneq ajorput.

 

Ilinniartitseriaatsip atugarinissaa pingaartuuvoq

”Sammisat” misilerarnerata pinnginnerani peqataasut ilinniartitsinermik, siunissami mutinngortussanik aamma e-læringimi, blended læringimi aamma kooperativ læringimi ilinniartitseriaatsimi najoqqutassanik pikkorissartitsineeraq ingerlappaat, taamaalilluni app’it atorneranni qarasaasiaq atorlugu ilinniartitsinermi sakkussatut ilinniartitsinermilu ilassutissatut atuagarsornikkut siunissamut takorluukkanut tunngatillugu tamat sammisarineqarlutik.
   Ilinniartitsisarfiusumi assersuutigalugu inooqatigiiffimmi tusagassiorfiit isigisinnaasatullu isumassarsiassat, paasissutissat tamarmik sukkasuupilussuuffii aallaavigalugit qanoq ilinniagaqarnerup allanngortarneranut tunngatillugu siunissamut mutinngoriartortussani ilinniartitsisut malinnaanissaat pingaartuuvoq.
   Kommune Kujallermi aamma Qeqqata Kommuniani atuartut Danmarkimi aningaasaateqarfimmit ukiualunnguit qaangiuttut ipad’inik tunisipput. Taakku atugarisarneri atuutsinneqaleriartorput, piffissarlu apeqqutaaginnalerpoq kommunit sinneri marluk ilanngunnissaanut. Taamaattumik inuusuttunik atuagarsornikkut piginnaanngorsarnissamik pisariaqartitsisunik Piareersarfiit tigusinissaminnut piareersimasariaqarput. Taakkuami meeqqat atuarfianni ipad’inik atugaqartarneq sungiutereersimassavaat.

 

Nunatsinnit app’i ilinniartitsinermi sakkutut

”Sammisat” suli inaarlugu piariinngitsoq ilinniartitsisunit misilerarnissaanut piareersimalereerpoq. Isumasioqatigiinnermi peqataasut ”Sammisat”-mik ilisarititsiffiusut atuisartunngortitaapput, taamaalimmatalu ilinniartitsinermik ingerlassassaliorneq misilerarlugu suliarineqarpoq. ”Sammisat” atorlugu ilinniartitsinermik ingerlassamik suliaqarnermik app’imik iluarsaassamik, pisariunngitsumik atugassaqqissumillu inaarlugu suliaqarnissamut peqataasut misilittagaat siulliit atorneqassasut pilersaarutaavoq.
   ”Sammisat”-mik ineriartortitaqartut misileraanerup nalaani malittarinneqqissaarput. Tupaallaatigisatut misigisat aqqusaarneqarput, atuuffiit iluarsiiviginissaannik kissaateqartoqarluni, atuuffinnullu nutaanut isumassarsisoqarluni. Tamakku suliniummik siulersuisumut ineriartortitsisunullu ilisimalikkat pingaaruteqartuupput, taamaalilluni saqqummiunneqaruni atugassatsialanngortillugu ”Sammisat” inaarutaasumik ineriartortinneqarsinnaassammat. Isumasioqatigiinnermi inerniliussat ”Sammisat” naammassinissaanut atorneqassapput, aggustimiillu decembarip tungaanut piffissaq misileraaffiusussaq aallartissasoq pilersaarutaavoq.