Aqqutissiuussineq

Kinaluunniit ilinnialernissaminut aqqutissiuunneqarsinnaavoq. Ilinniarfiit pillugit paasissutissanik pissarserusukkuit, aqqutissiuussisumik oqaloqateqarusukkuit aamma ilinnialernissamut qinnuteqaammik taassuminngalu immersuinissamik ikiorneqarusukkuit Piareersarfimmut tikilluaqqusaavutit. Nunatsinnilu ilinnialernissamut qinnuteqarsimaguit immersukkatit Piareersarfimmut aamma tunniutissavatit.

Ilinnialernissamut aqqutissiunneqarneq

Inuussuttut ilinnialernissamik kissaateqartut aqqutissiuunniarnerini uku siullertut paasiniarneqartarput: kinaassusertik eqqarsaatigilluarsimaneraat, pikkoriffitik soqutigisatillu sumilu sulilerusunnersut. Inuussuttummi soqutigisaat assigiinngitsuupput, soorlu assassullaqqissut, allaffimmiutut piginnaasallit taakkualu piginnaasaat assigiinngitsutigut paasiniarneqartarput, soorlu qarasaasiaq atorlugu, immersugassami apeqqutit akinerisigut il.il.

Meeqqat atuarfianni imaluunniit GUmi naammassilluni karakterit ilinniakkamik aallartitsinissamut, naleqquttuunersut paasiniarneqartarput. Karakterit naleqquttut pigineqanngippata qaffassarneqarnissaannut periarfissat aamma eqqarsaatigineqartariaqarput misissuataarneqartarlutillu. Ilinnialerusutallu tungaanut iliuusissat aqqutissallu assigiinngitsut qulaajarneqartarput, aqqutissarmi ataasiinnaanngilaq.

Piareersarfimmi aqqutissiuussisup suliassarivaa ilinnialerusutamut aqqutissap paasiniarneqarnissaa. Attavissat iserfigalugu illoqarfigisanni Piareersarfik nassaariuk.