PKU

Ilinniagaqarsimanngitsunut Piginnaasanik Ineriartortitseqqinneq Naalakkersuisuni pingaaruteqartuuvoq kissaatigineqarluni sulisinnaassutsip qaffassarneqarnissaa piginnaasat najoqqutaralugit.

Piginnaasanik ineriartortitseqqinneq PKU’p pikkorissartitsisarnerini assigiinngitsorpassuusuni pisarpoq, ilisarnaatigikkajuttarlugillu:

-    - Inuussutissarsiutinik Ilinniarfik ineriartortitsisoq pikkorissaanernillu naammassinnittoq.

-    - Pikkorissarnissap ingerlanissaa pilersaarusiorneqartarpoq immikkoortortanut 3-5’inut katitigaallutik, amernertigullu sapaatip akunnerini ataaseq marlunnilu sivisussuseqartarluni.

-    - Suliffissarsiuisarfinniit pikkorissartussat nalunaarutigineqakkajuttarput.

- Aningaasartuutit PKU-p kontoaniit akilerneqartarput ilanngullugit pikkorissarnermi ajunngitsorsiat.

 

Ilinniagaqarsimanngitsunut piginnaasanik ineriartortitseqqinnerup pikkorissaanermi aningaasartuutissanik aalajangersagaqarpoq, pikkorissarnerup nalaani pikkorissarnermut ullormut suliffeqanngitsumut 650 koruuninik ajunngitsorsiassarsisoqassaaq, pikkorissarnerup naammassinerata kingorna sapaatit akunnerini marlunni sisamaniluunniit sivisussusilimmi suliffimmik misiliisinneqarsinnaapput.

Piginnaasanik ineriartortitseqqinneq ukunani ingerlanneqartarput: Inunnik isumaginninnermik, peqqissaanermik, aatsitassarsiornermik, sanaartornermik, saviminilerinermik, takornariaqarnermik, oqaasilerinermik, tuniniaanermik sullissinermillu, imarsiornermik inuussutissalerinermillu imaqartuni.

Ilinniagaqarsimanngitsunut piginnaasanik ineriartortitseqqinneq (PKU) 2008-mi pilersinneqarpoq, siunertaralugu kalaallit ilinniagaqarsimanngitsut sulisartuusut pikkorissartarnissaat suliffissaaleqineq akiorniarlugu, suliffissanillu ineriartorfiusuni piumasaqaataasunik naammassinninnissaq pillugu.

Piginnaanngorsaanerup annertusineratigut najugaqavissunik sulisinnaassusilinnik pigisaqarnerput annertusissaaq tikisitaniit sulisinnaassuseqartuninngarniit.

”Suliffissaaleqisup pikkorissareerneraniit suliffeqarfimmullu atassuteqalereersimaneratigut suliffissaaleqisup suliffeqarfimmi sulilernissaa ilimanaateqarnerusarpoq. Tamanna ilinniagaqarsimanngitsunik piginnaasanik ineriartortitseqqinnerup ataani pikkorissarsimatilluni pilersarpoq, susassaqarfiup aalajangersimasup iluani tamannalu pillugu suliffissaaleqisoq malitsigisaanik sulinissaminut ilimanaateqarnerulersarluni.”

Aningaasaliissutigineqartartut inatsit naapertorlugu ingerlanneqassaaq Inatsisartut inatsisaat nr. 10, 19. maj 2010-meersoq pillugu inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit ilanngullugu Inatsisartut inatsisaata allannguutaa nr. 3 4. juni 2012-meersoq pillugu Inatsisartut Inuussutissarsiutinut Ilinniartitaanerit pikkorissaanerillu Inuussutissarsiutinut Ilinniakkat iluanni.

Ukiut pingasukkuutaarlugit Inuussutissarsiornermik Ilinniarfinnut isumaqatigiissusiortoqartarpoq, isumaqatigiissutinillu nutaanik 2019-2021-imut tunngasumik sanasoqarumaarpoq.