Majoriaq - Suliffissanut, ilitsersuinernut pikkorissaqqinnernullu qitiusumik ingerlatsiviit atertaaraat

Suliffissanut, Ilitsersuinermut Pikkorissaqqinnermullu
Qitiusumik ingerlatsiviit januaarip aallaqqaataani ateqalerput: Majoriaq.

Majoriaq tassaavoq qummukajaannguaq qaqisassaq. Majoriaq tassaassaaq suliffissarsiortut ornittagaat, ilitsersorneqarlutik pikkorissaqqillutik suliffeqarnermullu aqqutissaminnut ilinniarfissaminnulluunniit majuarlutik aqqutissaat.  

Suliffissanut, ilitsersuisarnernut Pikkorissaqqinnernullu qitiusumik ingerlatsiviit inatsit nutaaq aqqutigalugu januaarip aallaqqaataani 2016 pilersinneqarnerisigut nunatsinni Piareersarfiit aamma Suliffissarsiuussisarfiit kattunneqarput, tamanna Naalakkersuisut suliffeqarnermi 2015-imi periusissiaanni ”Suliffeqarneq toqqissisimanartoq”-mi suliniutaasa ilaagaat.  Suliffissarsiuussisarfiusimasut Piareersarfiusimasullu siunissami qaninnerullutik suleqatigiilissapput.

Siunertaasoq tassaavoq Suliffissanut, Ilitsersuinernut Pikkorissaqqinnernullu aqqutissap ataasiinnaanissaa.

”Pisariaqartinneqarpoq eqaatsumik naammassisaqarfiusumillu inuusuttortatta suliffissaaleqisortattalu Majoriamut saaffiginninneranni ilitsersorneqartarnissaat, sukkasuumik ilinniakkamut, pikkorissarnermut suliffissamulluunniit ingerlaqqissinnaaqqullugit, taamalu suliffissaaleqinerminnik qaangiisinnaaqqullugit. Upperaara iluaqutissarsivigissagipput Piareersarfiit Suliffissarsiuussisarfiillu ingerlatsinerisa ataatsimoortinneqarneri, innuttaasut ataatsimoortumik isaaffik ataaseq aqqutigalugu saaffissaqalernermikkut iliuusissaminnut pilersaarusiuunneqartassammata, - pisariaqartigunnaassallugulu oqartussaasunut assigiinngitsunut ingerlaqqinniarnerminni saaffiginneqattaarnissaq,” Inuussutissarsiornermut, Suliffeqarnermut, Niuernermut Nunanullu Allanut tunngasuni Naalakkersuisoq Vittus Qujaukitsoq oqarpoq.

Annertunerusunik paasisaqarniaraanni attavigineqarsinnaavoq Naalakkersuisoqarfimmi pisortaaneq Jørn Skov Nielsen, +299 34 56 34, jsn@nanoq.gl